Mybrary.ru

Софроний Сахаров - Молитвенное приношение старца Софрония

Тут можно читать бесплатно Софроний Сахаров - Молитвенное приношение старца Софрония. Жанр: Самосовершенствование издательство -, год 2004. Так же Вы можете читать полную версию (весь текст) онлайн без регистрации и SMS на сайте mybrary.ru (mybrary) или прочесть краткое содержание, предисловие (аннотацию), описание и ознакомиться с отзывами (комментариями) о произведении.
Название:
Молитвенное приношение старца Софрония
Издательство:
-
ISBN:
-
Год:
-
Дата добавления:
27 декабрь 2018
Количество просмотров:
107
Читать онлайн
Софроний Сахаров - Молитвенное приношение старца Софрония

Софроний Сахаров - Молитвенное приношение старца Софрония краткое содержание

Софроний Сахаров - Молитвенное приношение старца Софрония - описание и краткое содержание, автор Софроний Сахаров, читайте бесплатно онлайн на сайте электронной библиотеки Mybrary.Ru
Книга представляет собой сборник молитв, написанных архимандритом Софронием Сахаровым (1896-1993), автором знаменитой книги «Преподобный Силуан Афонский». Обогащая молитвенную практику Православной Церкви, книга адресована всем интересующимся молитвенным деланием.

Молитвенное приношение старца Софрония читать онлайн бесплатно

Молитвенное приношение старца Софрония - читать книгу онлайн бесплатно, автор Софроний Сахаров

ВЛАДЫКО ВСЕДЕРЖИТЕЛЮ, Иисусе Христе, безначальнаго Отца собезначальне Сыне и Слове, непостижимым истощанием Твоим все домостроительство спасения мира прекрасне совершивый, и в безмерности снисхождения вручивый немощным людем служение сему великому Таинству. Молим Тя, Владыко Христе, да почиет благоволение Твое на всем деле священныя службы нашея; очисти ны от всякаго греха и неправды; силою Духа Святаго преобрази все существо наше во мраке страстей лежащее, и возсоздай в нас искаженный падением Адама Твой образ предвечный, яко да и мы сподобимся непостыднаго предстояния Престолу Твоему, Иисусе Спасе мира.

Ей, Боже, Боже наш, милостивно приими от рук наших сию страшную Жертву о гресех наших, да причастницы сущи Божественных Твоих Тела и Крове, обрящем мзду верных Твоих служителей.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Шестая пятерица

ОТЧЕ, СЫНЕ И ДУШЕ, в триех Лицех нераздельная Единице, Троическое едино Божество, Существо неприкосновенное, Свете неприступный, Тайно сокровеннейшая, от всея твари покланяемая, спаси ны верою и любовию воспевающия Тя; молим Ти ся, услыши ны и помилуй.

ОТЧЕ БЛАГИЙ, почтивый ны образом Твоим и даровавый нам радость познати истину Твою чрез воплощение Единороднаго Сына Твоего и сошествие Святаго Духа, от Тебе исходящаго; не отврати Лица Твоего от нас, недостойных раб Твоих и ниспосли на всех сынов человеческих дух истиннаго благочестия, да якоже воды наполняют море, тако да исполнится вся земля нетленным светом Твоего богоразумия; молим Ти ся, Отче Святый, услыши ны и помилуй.

ГОСПОДИ ИИСУСЕ ХРИСТЕ, Агнче Божий, Победителю Святый, приявый крестную смерть нашего ради спасения, избавивый нас от работы вражия, да нектому себе живем, но Тебе Единому, за ны умершему и преславно воскресшему. Сподоби нас достойно восприяти святых Твоих Тайн, да все, еже есть мертвенное в плоти нашей, пожерто будет нетленным Твоим животом; молим Ти ся, Христе, услыши ны и помилуй.

ДУШЕ СВЯТЫЙ, вечности Царю и жизни нетленныя Подателю, по множеству скорбей и воздыханий наших, умножи милость Твою в нас и низложи вся борющия ны враги, и буди Сам Ты действуяй в нас вся благоугодная Тебе, и освяти всех нас души и телеса освящением неотъемлемым; молим Ти ся, услыши и скоро помилуй.

ГОСПОДИ ИИСУСЕ ХРИСТЕ, непорочне Агнче Божий, закланный от сложения мира, Иже Кровию Своею искупил еси нас от всякаго колена и языка, сотворивый нас цари и иереи Богу и Отцу Твоему. Ты бо завесою пречистыя Плоти Твоея обновил еси нам путь новый и живый во Святая Святых во еже приносити сердцем сокрушенным и духом смирения словесную сию и безкровную службу нашу о гресех наших и о всем мире Твоем.

Темже припадаем и в умилении вопием Ти, долготерпеливе Господи: Духом страха Твоего осени нас, в час сей дерзающия приступити к подножию сея великия Тайны спасения мира, и сподоби нас сердцем, измовенным слезами, и умом, просвещенным евангельским Твоим словом, прикоснутися, елико по нашей силе, к таинству Твоего Божественнаго истощания.

О Свете мира, Егоже трепещут Серафими, лица закрывающе пред неприступною славою Твоею, и нас на земли удовли всеблагоговейно воззрети на Тя, молящагося с воплем крепким и со слезами в Гефсимании и восходяща на Голгофу, да чада Божия расточенная собереши воедино распростертыма на Кресте рукама Твоима.

Ей, Агнче Божий, вземляй грехи мира, запечатлей в нас сей образ Твой непостижимый, и укрепи ны последовати Тебе, аможе аще пойдеши, да Плотию Твоею пречистою питаеми и честною Кровию Твоею напаяеми, явимся люди обновления и царское священие во еже неосужденно ходатайствовати за весь род Адамов от начала даже до скончания века.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Седьмая пятерица

ОТЧЕ БЛАГИЙ, Сыне Единородный, Душе Святый, Троице Единосущная, не отврати Лица Твоего от нас, яко скорбим; приими словесную сию службу нашу, приносимую Тебе сердцем сокрушенным и духом смирения, и сподоби нас воздати Тебе чистую хвалу о благодеяниих Твоих, и в мире глубоцем сохрани нас даже до последняго нашего издыхания; молим Ти ся, услыши и помилуй.

СЫЙ ОТ ВЕКА и прежде всех веков безпредельный и неизменный Господи, обратися и умолен буди на рабы Твоя, ибо в трудех и болезнех оскудевают дни наши и близок час нашего к Тебе отшествия, приими нас, припадающих к Тебе и укрепи ны в сей час предстояния нашего страшному Престолу Твоему к безкровному священнодействию и к неосужденному причастию Святынь Твоих; молим Ти ся, Отче благий, услыши и помилуй.

ГОСПОДИ ИИСУСЕ ХРИСТЕ, Единородный Сыне Отца безначальнаго и Слове, Имже вся быша, и без Него ничтоже бысть, еже бысть, пришествием Твоим во плоти возсоздавый падший в первороднем Адаме образ Твой, приими поклонение наше и мольбы, из глубины греховныя тьмы возносимыя к Тебе, и силою Твоею возведи ны на высоту истиннаго разумения заповедей Твоих, да светом евангельскаго слова Твоего просвещени, сподобимся неосужденно причаститися Божественных Твоих Тайн, Плоти и Крове Твоея; молим Ти ся, Господи Иисусе, услыши и помилуй.

ДУШЕ СВЯТЫЙ, Свете незаходиме, Свете неприступне, благий Утешителю, ходатайствуяй о нас ко Отцу воздыханьми неизглаголанными, в сей страшный час Тайныя Вечери Христа, осени нас пришествием Твоим, и силою Твоею удовли ны к совершению сего Божественнаго священнодействия, Царствия Христова причастники ны сотворяя; молим Ти ся, скоро услыши и помилуй.

ГОСПОДИ ИИСУСЕ ХРИСТЕ, Боже Спасителю наш, мир Твой подавый человеком и Пресвятаго Духа дар с небес ниспославый в наследие неотъемлемое верным, Егоже преестественным действом нетленный свет боговедения роду человеческому даровася, и мы прелести, якоже тьмы, избавихомся и Тебе богословити со Отцем и Святым Духом, во едином Божестве, и силе, и власти озарихомся. Ты убо, Христе, Сый Отчее сияние, Существа и Естества Его неизменное и недвижное начертание, Источниче премудрости и благости неизследимая Пучино, отверзи сердце наше и утверди ум наш во еже знати Тебе, единаго истиннаго Сына Божия, вземлющаго грехи мира. Приими и нас, обуреваемых в мире сем, якоже приял еси Петра в море утопающаго, и укрепи нас силою Твоею на борющаго нас диавола. Се бо со страхом предстоим Тебе, в бездну милости Твоея отчаяние душ наших повергающе. Глаголом Твоим и неизреченною силою премудрости Твоея управляяй всю тварь, исправи живот наш к заповедем Твоим; тихое обуреваемых пристанище, единый истинный Путю, скажи нам путь воньже пойдем, яко Тебе предахом души наша: Дух премудрости Твоея безумию нашему даруй; Духом страха Твоего осени вся дела наша, да на всякий день и час Духом Твоим наставляеми и укрепляеми, сподобимся во всем творити волю Твою святую и всесовершенную. Яви нас носители Новаго Завета Твоего, иже в Крови Твоей, Иисусе Спасе наш, причастники нас сотворив пречистых Твоих Таинств; по множеству милости Твоея, приими нас, да будем достойны приносити Тебе жертву духовную о гресех наших и сподоби нас без порока служити Тебе вся дни живота нашего, яко да и мы унаследуем часть верных Твоих служителей в день страшный воздаяния Твоего праведнаго.

Яко да под державою Твоею всегда храними, Тебе славу возсылаем со Отцем и Святым Твоим Духом, ныне и присно и во веки веков.

Аминь.

Восьмая пятерица

ОТЧЕ БЛАГИЙ, Сыне Единородный, Душе Святый, Троице Святая и всезиждительная, непостижимым повелением Твоим призвавшая нас от небытия в жизнь сию, и Тебе Единаго воистину Сущаго Бога познание нам даровавшая, сподоби нас в сей страшный час священнодействия принести Тебе разумное благодарение и непорочное славословие; молим Ти ся, услыши и помилуй.

БОЖЕ ОТЧЕ ВСЕДЕРЖИТЕЛЮ, безначальне, неизменне, непостижиме, даровавый нам в Сыне Твоем Единороднем и возлюбленнем обручение будущаго наследия и славу сыноположения, низпосли на ны Духа Твоего Святаго, Иже да совершит ны во всяком деле блазе, наипаче же в сей страшный час священнодействия Божественных Твоих Тайн; молим Ти ся, услыши ны и помилуй.

ИИСУСЕ ХРИСТЕ, Боже, Спасителю наш, едине истинный Архиерею, Святый и непорочный, очисти ны от всякия злобы и лукавства, и даждь нам участие и наследие со всеми от века святыми в неизследимей Тайне любве Твоея, причастием Божественных Твоих Тела и Крове; молим Ти ся, услыши и помилуй.

ДУШЕ СВЯТЫЙ, Боже Живый и животворяй, вечности сый вечность, яко Сый прежде всех веков, от Него же исходит всякий свет бытия, милостивно призри на немощь естества нашего, помяни болезни наша и скорби, труды и злострадания, и силою Твоею Божественною удовли ны к достойному совершению сего небеснаго священнодействия; молим Ти ся, услыши и скоро помилуй.


Софроний Сахаров читать все книги автора по порядку

Софроний Сахаров - все книги автора в одном месте читать по порядку полные версии на сайте онлайн библиотеки Mybrary.Ru.


Молитвенное приношение старца Софрония отзывы

Отзывы читателей о книге Молитвенное приношение старца Софрония, автор: Софроний Сахаров. Читайте комментарии и мнения людей о произведении.

Прокомментировать
Подтвердите что вы не робот:*
Подтвердите что вы не робот:*
Все материалы на сайте размещаются его пользователями.
Администратор сайта не несёт ответственности за действия пользователей сайта..
Вы можете направить вашу жалобу на почту my.brary@yandex.ru или заполнить форму обратной связи.
×
×